بصوا بقى
... من غير لف ولا دروان
أنا بقالي فترة عاوز أكتب حاجه وكنت عاوز أخلي البوست الجاي مفاجأة
لكن البت خيخة عمالة تسأل كل شوية على المفاجأة الحلوة
لذلك
قررت إني اقولكم وأمري لله
... من فترة كده نويت والنية لله إني أتوكل على الله و
... أخطب
أيوة أخطب وأكون زي البني أدمين الموجودين على وجه البسيطة على الرغم من كل موجات الغلاء والطرق المعيشة اللي داخلة على حيز المستحيل كمان شوية
... والحمد لله خطبت من فترة كمان وربنا أكرمني بواحدة محترمة وملتزمة وزي الفل وربنا يتمها علينا بفضله
... لكن
الحلو مش بيكمل على رأي المثل
كل ما أجي أعمل حفلة خطوبة كده على خفيف زي ما السنة قايلة
يطلع طارئ جديد يلزمني إني أأجل وبقالي على كده يجي أربع مرات تقريبا بقالي كام شهر
وكل مرة أكتب في المدونة وأقول انتظرونا قريبا لكن ما باليد حيلة
أعمل ايه بقى
وبعد طلب خيخة المتكرر والجمهور العريض معرفة الجديد ماقدرتش أصبر وأطنش تاني وقررت إني أتحفكم بالخبر السعيد ده
وطبعا كلكم فرحانين جدا علشاني
... أنا عارف
وأحب كل من ساهم وشارك في هذه الخطوة المهمة في حياتي وأولهم أخر العنقود وهند وأختي شوشو وأختي لولو وكل قرايبي اللي وقفوا جنبي وكمان خليفة ودكتور حر وكل الحبايب والأصحاب وباهديهم أغنية
أدور على اللي راح مني لمحمد عبد المطلب
عادي دي على الماشي كده
أما قصة الخطوبة دي بقى فهي قصة تاني خالص يمكن يجي يوم أحكيها لكن المؤكد إني مش هاحكي دلوقتي خالص
كفاية كده .... انا عارف إني أزعجتكم
ياريت تدعوا لي قوي
تتلقى التبريكات والتحيات المباركات على العنوان التالي
جمهورية مصر العربية ـ محافظة المدونين ـ مدونة المضيفة
ولا عزاء للرجال ولا للسيدات
كله أفراح إن شاء الله
ويجعله عامر بحسكم يا ناس يا أمرا
