Tuesday, January 29, 2008

تاج من الصباغ

بسم الله

أولا يا جماعة مش كنت عاوز اكتب حاجه دلوقتي لحد ما أحط مفاجأتي الأول

لكن خالي الصباغ عزمني على تاج بقاله شوية مركون وبصراحة أحرجت أصبر أكتر من كده

قلت في عقل بالي ياد يا صاحب المضيفة رد على خالك ده حتى من باب الذوق و الأدب

لذلك نتكل على الله ونبدأ نجاوب وربنا يستر

هل توافق على حذف خانة الديانة من البطاقة الشخصية ؟

هي دي عاوزة رأي .... طبعا لأ


ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

طبعا لاأوافق على ذلك وربنا يكفينا شر كل غريب في مجتمعنا


هل تعتقد بوجود إضطهاد للمسيحين فى مصر ؟

ياسلالالالالالالالالالالالالالام ... سؤال مضحك قوي بصراحة


من هو الشخص الذى تختارة لرئاسة مصر ؟

اللي ينفع ساعة الاختيار ... أي واحد يتقي ربنا فينا وخلاص


أذا قمت بتأسيس حزب سياسى ... من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟

كل واحد شايف في نفسه انه ينفع ويخضع للمقايس المعروفة في هذا المجال يا مرحب بيه وبعدين الاخوان او الأقباط أهلا بيهم في أي مكان طالما وجودهم بيحقق المصلحة العامة وقديما قيل ... أينما حلت المصلحة العامة فثم شرع الله


فى رأيك الشخصى ... ما هى أفضل مدونة على بلوجر قمت بزيارتها ؟

بدون مناقشة ... عصفور المدينة ... بدون زعل يا خال الله يعمر بيتك


للذكور فقط : أيهما تفضل كزوجة ... إمراءه عاملة ، أم ربة منزل ؟

ربة منزل طبعا ... تخلي بيتي جنة من مجاميعه أرجع له أخر اليوم وأنا متلهف على دخوله


اذا تزوجت وأنجبت ولدين وبنتين ... أى الأسماء تحب أن تسمى ؟

من الذكور : مهند و براء
من الإناث : رفيدة و عائشة


هل تعتقد أن توريث الحكم فى مصر .... سيتم فعلا أم لا ؟

الله أعلم ... الواحد بقى مش عارف بكرة هايكون فيه ايه


فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

أهم انجاز ... الكباري اللي نازلة ترف على دماغنا في كل حته .... وأسوا عمل ... المحاكمات العسكرية اللي نازلة ترف على روس العباد كل كام سنة


كفاية ويارب تكون اجاباتي حلوة وخفيفة عليكم


أمرر التاج للبشر دول

دكتور حر

أخر العنقود

خيخة هانم

فرنسا هانم

صمود

عاشقة الفردوس

Tuesday, January 22, 2008

يارب

ماقدرتش أصبر أكتر من كده


للتضامن مع أهالي غزة


لا تبخل حتى بالدعاء


اللهم فرج كربهم وأمن روعهم وانصرهم على أعدائهم


أمين

Friday, January 18, 2008

فاصل ونعود

إجازة بسيطة من التدوين وعالم التدوين


إجازة بسيطة لإلتقاط الأنفاس والعودة مرة أخرى إن شاء الله


إجازة لمحاولة إعادة تأهيل حياتي بشكل أفضل


كل المطلوب إنكم تدعوا لي جدا


أشوف وشكم على خير

Monday, January 14, 2008

صفة عن صفة .... تفرق

كل واحد يفكر في الموقف ده كويس


لما بتلاقي واحد صاحبك او عزيز عليك بيسألك في امر يهمه او حاجه مزعلاه وبيطلب رأيك بتلاقي نفسك في كتير من الأحيان بتقوله كلام جامد قوي وكتير بتستغرب من نفسك على كمية الحكمة اللي نزلت عليك مرة واحده
لما تحط نفسك مكانه في نفس الموقف هيحصل ايه ؟؟؟؟ في الغالب بتكون عاجز عن التفكير بمنطقية وبنفس الأسلوب اللي انت كلمت بيه الشخص ده


يبقى السؤال بقى

ليه دايما بيبقى عندنا ازدواجية في التفكير في حل مشاكلنا مع ان الحل غالبا بيكون معانا بس بيحتاج شوية تفكير
الحل في الرشد و التوكل والتفويض

ايه الفرق بقى
الرشد والتوكل والتفويض
الرشد ... هو معالجة الأمر بموضوعية وكفاءة خصوصا في لحظات الصدمة الأولى إن وجدت لا قدر الله
التوكل ... هو الإعتماد على الله بعد الأخذ بالأسباب
لكن التفويض ... هو الإعتماد على الله قبل الأخذ بالأسباب وبعدها كمان

الفرق كده واضح جدا

والتلاتة احلى من بعض

لما حد يجربهم هيعرفهم كويس جدا ومش هيستغنى عن أي صفه فيهم
لذلك جميل قوي الدعاء اللي بيقول

اللهم ألهمني الرشد عند كل امر

اللم إكفني بحلالك عن حرامك وبفضلك عمن سواك

اللهم اني أعوذ بك من العجز والكسل وأعوذ بك من الجبن والبخل وأعوذ بك من غلبة الدين وقهر الرجال

والأدعية كتير قوي في الناحية دي لكن اللي يفتكر يدعي هو الفايز
وكل الأدعية الدالة على التوكل والإستخارة وطلب الرشد والإعتماد على الله في كل أمر من أمور الدين او الدنيا
وياريت الأذكار في كل يوم ... دي بتخلي الواحد دايما محصن ضد كل حاجه غريبة وشاذة ومؤذية

دي روشتة إيمانية كده على الماشي كده لحد ما ربنا يفرجها علينا


دعواتكم الغالية


سلامات كبيرة قوي

Tuesday, January 8, 2008

الحب .... وأشياء أخرى

السلام عليكم ورحمة الله


بصوا بقى يا جماعة

أنا عمري ما خفت وانا جاي اكتب بوست قد النهادره

وكنت ناوي اكتب عن الحب بطريقة فكرية أدبية شوية

لكن أنا فكرت شوية وقلت لأ

لازم أكتب عادي زي بقية البشر علشان الكلام ده بجد عاوز طرح بأسلوب عادي ونخلي الفلسفة فيه المرة الجاية إن شاء الله

لكن بجد أنا مش كنت متوقع حجم التفاعلات الكتير اللي جات ونبدأ نفصص وندور بين الردود ونشوف كل واحد هياخد كام


أولا
كل التعليقات يا جماعة أصابت كبد الحقيقة وجات على الوجيعة وكل واحد بص للموضوع من زاوية اخرى
شكرا لمحمد مفيد وبهاء ورينا وعبد الرحمن ومروة وأماني وكلكم ... علشان مش انسى حد وحد يزعل

لكن فعلا

أكتر تعليق خوفني ....

تعليق الباشا عصفور المدينة ... ربنا يستر لحد الاخر

أكتر تعليق عجبني ...

تعليق فرنسا هانم والبت خيخة ومنى

أكتر تعليق منهجي وحلو ( حلو منهجي ده ) صح ؟؟

عاشقة الفردوس والاستاذ الجرايحي وأماني أبو زيد

أكتر تعليق ظريف

نظريات صرصارة هانم ... نعمل ايه معاها بقى

لكن فعلا فعلا نظرتي ليه

هي مزيج من كل الكلام اللي ورد هنا

الحب يا أسيادنا هو مادة الحياة ومادة الروح

الحب هو إكسير الحياة ورونق الدنيا

حب الله عز وجل وحب النبي صلى الله عليه وسلم هو الدافع لكل بني ادم مننا في الدنيا دي

حب الطاعة وما يقربنا من الله عز وجل بشتى الطرق هو الوسيلة لدخول الجنة

حب صحابة النبي صلى الله عليه وسلم والصالحين تدخلنا الجنة برفقتهم

حب الدين وحب عزته ونصرته

حب الوالدين فالجنة تحت أقدامهم

حب الوطن وحب رفعته وعزته ومجده وتطهيره من كل خطأ

حب إخوتي فبهم عزي ومهابي ومن لحمي ودمي

وأخيرا

حب الزوجين لبعضهم ... حبهم مادة حياتهم

حبهم تتويج لعلاقة جميلة شرعها الله بينهم في الحلال

الحب غالبا يتطبع بالطابع الشخصي فتظل السمات الشخصية هي ما تحرك تلك الحاسة والشعور وتغلب عليه الظواهر اللشعورية في كل ابن أدم

فتظل العلاقة الأبدية من الجنون والاندفاع مع الدفء والاستمتاع
تحرك تلك العاطفة أينما ذهبت ومتى شاءت

يبقى الحب في النهاية هو ذاك الشعور الذي يسري بداخلنا فيفجر الطاقات الكامنة ويحي القلب الميت

هو ده الحب اللي حكت عنه أختي خيخة في كلامها اللي عجبني جدا

الحب اللي يخلي الاتنين واحد والنفسين نفس واحده في جسدين

الحب اللي بيخلي كل واحد بيحس بالتاني حتى لو بعيد عنه لحظتها

الحب اللي بيحرك القلب ويهزه على حبيبه كل دقيقة

الحب اللي بيخلي الواحد بيفكر في حبيبه كل لحظة ومش بيقارق خياله

الحب اللي بيخلي الواحد يعين صاحبه على الطاعة علشان هو نفسه يدخلوا الجنة سوا

الحب اللي بيخلي كل واحد فيهم همه على التاني في أي حاجه ممكن تضره

الحب الأشكال اللي قالتها فرنسا هانم في تعليقها

الحب اللي ذكرتها عاشقة الفردوس

الحب اللي اتكلم عنه الأستاذ الجرايحي

الحب اللي كل واحد فيكم ذكره بطريقة مختلفة وكلكم صح في عرضه

الحب ساعات بيكون نظرة ... ساعات بيكون خفقة قلب ... ساعات بيكون لمسة ايد ... ساعات بيكون سؤال في غيبة التاني

الحب جنون واندفاع

دفء وإستمتاع

سؤال ولهفة

شوق وأنين

همس وحنين

نظرة وهيام

كلمة وسباحة في الخيال

... الحب إكسير المحبين

... وأهات المعذبين

... ونوح المحرومين

... ونداء المبعدين

.... وهمس المقربين

.... ومناجاة العاشقين

الحب مزيج من الشوق واللهفة والهيام والأنين والحنين


كفاية كده لإن الكلام مش هايخلص ... ونحاول إن شاء الله نكتب عنه تاني من نظرة فلسفية بحتة

معلش الكلام بيجي شوية فلسفي على شوية عامي
لكن غصب عني والله


ربنا يعين ونعرف نكتب عنه حلو بس

Sunday, January 6, 2008

معنى الحب

بعد المداولات والمرافعات في البوست اللي فات



وبعد النصائح الموجهة بين السطور من المشاركين


جال بخاطري هذا السؤال ... وأنتظر الإجابة بكل شغف


هل الحب ....


جنون واندفاع

أم ...


دفء واستمتاع


عاوز أسمع تعليقات عن نظرة كل واحد في الحب ايه

بس أفكار بجد ... مش هزار

واللي هيهزر


هو حر



في انتظار تعليقاتكم