Saturday, March 7, 2009

ايه الفرق




ما الفرق بين الاعتقاد واليقين

حينما أقول أنا أعتقد .... أو .... أنا أوقن .... أنا متأكد

ما الفرق ؟


ما الفرق بين الانبساط والفرح والسعادة والسرور

حين نقول

أنا مبسوط .... أنا فرحان .... أنا سعيد ... أنا مسرور


ما الفرق بين

بص .... وشوف


ما الفرق بين

اقعد واجلس

ما الفرق ؟


انا هنا أتكلم عن المعاني العامية للموضوع دون الغوص في مدلولات الكلمات العربية الصرفة


دائما ما يأتي في بالي مثل هذه التساؤلات

بالتأكيد حياتنا اليومية تمتلأ بمثل هذه التشبيهات المترادفة


ياترى في الاخر بناخد بالنا مما نقول ولا بنقول وخلاص



تحياتي




43 comments:

فاتيما said...

الأول
ازيك يا عريس مع وقف التنفيذ
ثانيا
أنا شخصيا ملاحظة غن الناس بقت بخييييييييلة قوى فى كلامها و تعبيرها عن مشاعرها فيما عدا مشاعر الغضب و الضيق و الشتايم و كدا
بس قليل لما حد يقول كلام حلو مع إن الكلمة الطيبة متقلش عن البسمة و تعد صدقة ...و جرى إيه فى الدنيا لما تجامل حد و لا ترفعله معنوبياته حبتين و لو بالمبالغة ؟!!!
خالص تحياتى ليك و سلامى لخطيبتك آية الجمال و الاخلاق

وردة said...

كلنا بنعمل دون اهتمام
ونتحدث ايضا دون اهتمام
فلا نشعر ماذا نقول
وحين نركز نجد اننا احيانا نتحدث ونثرثر لمجرد ملئ الوقت
موضوعك كالعادة جميل
بارك الله فيك
سلام

جمعاوى said...

ياترى في الاخر بناخد بالنا مما نقول ولا بنقول وخلاص
?


ده سؤال يا عريس ...

طبعا بنقول و خلاص

(:

فراشة said...

صاحب المضيفه
اكيد كلامك صح
بس المشكلة ان هذه الكلمات اصبحت فى حياتنا وممزوجه بها جدا
بس الحمد فى الفترة الخيرة فى كلمات كتيرة اتغيرت لما عرفنا الصح بتاعها
هى مشكلة عايزه وقت
بس موضوعك متميز كالعادة ماشاء الله
تحياتى

mohammed alsha3r said...

وما الفرق ما بين المضيفه
ودار المناسبات

جاوب

*البت المشمشية *حلوة بس شقية * said...

العريس اهو
العريس اهو
هههههههههههه

محدش بقا يفرق بين اى حاجة
مبقتش تفرق
سينا من سونيا

kochia said...

بنقول وخلاص

الـسـيـدة نـون said...

انا سمعت انك كتب كتابك
وكمان عرفت ان دكتور حر كتب كتابه

عموما انا بباركلكم وبقولكم
احسن تستاهلوا


سلام

اختكم خيخة

صاحب المضيفة said...

الغالية ... فاتيما

الحمد لله انا بخير

فعلا كلامك مظبوط ومحتاجين لاعداة نظر في حاجات كتير في حياتنا

تحياتي وسلامي ليوسفك الجميل


كل الود

صاحب المضيفة said...

وردة هانم


لازم نشعر بما نقول علشان يقل لغونا وبالتالي تقل اخطائنا

تحياتي ودعواتي

صاحب المضيفة said...

جمعاوي باشا

منور المضيفة كلها يا باشا وعقبالك يا جميل

صاحب المضيفة said...

فراشة هانم

كلامك صحيح وكويس اننا بدانا ناخد بالنا من كده بشكل عملي

تحياتي ودعواتي

صاحب المضيفة said...

الشاعر باشا


منور المضيفة يا عمدة

الفرق يا جميل ان المضيفة دي دار الكرم كله في أي وقت وبأي شكل انما دار المناسبات باين من اسمها انها للمناسبات بس وبعد كده بتفضل مقفولة


:):):):):)


عرفت الفرق بقى يا ريس البلدية


:):):):):):)


تحياتي يا جميل

صاحب المضيفة said...

المشمشية


شكرا لمرورك وتهنئتك الكبيرة


كل التحية

صاحب المضيفة said...

كوتشيا هانم


فعلا

صاحب المضيفة said...

خيخة هانم

منورة المضيفة بعد طول غيبة


صحيح اللي سمعتيه ده وعقبال شيكو برضو

واهو يستاهل برضو


:):):):)


تحياتي

maha zein said...

اممممممممم
عموما يا عريس مع وقف التنفيذ علي راة فاتيما مع اني مش عارفة ليه

انا شايفة اننا بنستخدم في حياتنا كلمات كتير اوي
بس النظرية ان معظم الكلمات دي هتلاقيها عامية صرف
وصعب يكون وسطها كلمات لغة عربية

يعني بيتهيقلي محدش بيقول انا مسرور دي
ممكن نقول انا مبسوط وسعيد وفرحان
لكن مسرور
قليل اللى يقولها

وهكذا بردو اجلس واقعد
اقعد اكتر
بس تصدق بالله
ما جه في بالى سؤالك ده قبل كده

عادي بقه
الواحد بيحاول يصلح كلامه اللى فيه شبهات حرام
ذي الواحد ميقولش يا لهوي ويقول يا الهي

يقول جزاك الله خيرا بدل شكرا
يقول السلام عليكم بدل من الو
كده يعني
هو ده اللى الواحد بيركز فيه اكتر

يعني الكلام اللى ممكن يركبنا ذنوب بدون قصد

ميرا ( وومن ) said...

اممممممم سؤال محتاج تفكير

مش عارفة ليه فكرتني بزمبا ليا في الكلية كان دايما يجي المحاضرات ببدل وبيشرب بايب

ومرة كان عاوز يعدي من قدامي قالي استسمحك اعدي

قولته ياااااااااااااااااه الكلمة دي قديمة قوي بسمعها في الأفلام العربي القديمة بس

الخلاصة احنا بقينا بستسهل فمش بنفكر بنقول وخلاص

أنا حر said...

اعتقد ان الموضوع فيه جزء كبير بيرجع للتعليم وللتعود
والواقع بيعودنا على لغة معينة واسلوب محدد في الحوار
من الصعب تغييرة بسهولة
تحياتي

Mahmoud Ibrahim said...

الفرق

أني مبقولش المرادفات دي إلا وأنا معاك
مبسوط وفرحان وسعيد ومسرور

ربنا يخليك ليا

maha said...

سلام عليك يا صاحب المضيفة
بحب انا اوي اللعب بالكلمات ده اوي
يعني مثلا
انا بسمعك او انا منصته اليك
"انابترجمها من الانجليزي يمكن عشان كده مش واضحة اوي"
السمع ممكن تسمع اي حاجة
والانصات انك تسمع بتركيز
..
اوانظر و اتامل
انظر لمجرد النظر والتامل هوالنظر بامعان لتفاصيل شئ ما
...
ليها كلمات كتير اوي
بس ممكن كلمه يكون لها اكتر من معني وممكن تسبب سوء تفاهم
..
فكرة حلوة لبوست و تساؤل
دمت بخير
سلام
مها

Unknown said...

والله ما أظنش حد مركز كتير بموضوع الحكي

لأنو الظاهر كل إنسان عم بيسمع حاله وبس مؤخرا

والناس اللي بتدقق عالحكي-من خبرتي المتواضعه-تعبانين

ما ندققش أريح:)

بس خلاص ... said...

دائما تثير تساؤلات جدليه تجعلنا نفكر كثيرا ونتأمل فى كثير من المدلولات للكلمات او الموجودات حولنا
نشكرك على هذه المدونه التى تجعلنا اعمق تفكيرا واكثر جدلا

خديجة عبدالله said...

جميييل ماشاء الله
لابد من التفكر والتأمل وإلا ما جدوى العقل "أولى الألباب" ربنا يجعلنا منهم

طغت المادية المزيفة وأصبح التسرع يتجاوز مرحلة التأمل مع إن المراقبة من خلق المسلم ولا تقتصر على أفعال بل ألفاظ وحتى أفكار

جزاك الله كل خير ونفعنا الله بها
لفتة طيبة ومهمة تقبل الله منك

ملحوظة : عندى تدوينة ويسعدنى مرور حضرتك ودمت بخير

صاحب المضيفة said...

أختي مها

شكرا لمرورك وعريس مع وقف التنفيذ يعني كاتب كتابي بس

:):):):)


انما المترادفات دي امثلة فقط من اللي بنقوله على طول في حياتنا


كل التحية

صاحب المضيفة said...

وومن هانم


كتير بنقول الكلام ده وبرضو بنشوف في حياتنا اللي بيقول الكلام ده واصعب منه كمان

المهم

احنا بناخد بالنا من اللي بنقوله ولا لأ


هي دي الفكرة


تحياتي

صاحب المضيفة said...

أنا حر


كلامك مظبوط وفيه واقعية كبيرة كمان


كل التحية والاحترام

صاحب المضيفة said...

العزيز ... زيدان


عرفت بقى انا باتعلم الكلام الحلو ده منين


تحياتي يا صديقي اللدود

صاحب المضيفة said...

مها هانم

كلامك مظبوط وكمان مش بناخد بالنا من المترادفات العامية مش بتبان قوي كمان واحنا بنتكلم



تحياتي لتشريفك الطيب

صاحب المضيفة said...

مياسي

مين سمعك

والله انا كده على طول وعلى طول برضو تعبان من كتر التفكير


ربنا يعين ويهدي الحال


شكرا لمرورك انتي واهل الاردن الكرام


كل التحية

صاحب المضيفة said...

بس خلاص

شكرا لمرورك الكريم


كل التحية

صاحب المضيفة said...

أختي خديجة


كلامك مقنع وموضوعي بالفعل

ربنا يكرمك ويرضى عنك


رحنا عندكم وعلقنا كمان


موضوع رائع وسرد جميل


تحياتي ودعواتي

mado80 said...

مش عارف
بس بيتهيألي بنقول وخلاص
ومش عارف ده صح ولا غلط

بس المهم المعني يوصل
ولا ايه؟

كل التحيه والتقدير

خديجة عبدالله said...

السلام عليكم
معلش الطمع بقه أنا أضفت تحديث ولو حضرتك تحب تشوفه
ناس طماعة معلش :) وجزاك الله خيرا على حسن التواصل ودمتم بخير

Anonymous said...

يمكن انا من الناس اللى بدقق اوى فى الفاظى عشان استخدم الكلمات والتعبيرات اللى اقصد معناها بالضبط عشان كده احيانا اتكلم عاميه على فصحى
وعشان كده برضه احيانا اصحابى يستغربوا كلامى
تستهوينى جدا موضيعك المثيره للفكر والتامل
تحياتى
منى
مدونه احاسيس

رحلتنا في الحياة said...

مكن نكون بتكلم وخلاص واحنا مش عارفين كلامنا هيودينا لفين ثرثرة على الفاضى
مرسيى للمرورك على المدونة

صاحب المضيفة said...

mado

هو جميل ان المعنى يوصل لكن الأجمل اننا ناخد بالنا من كلامنا برضو ومش نتكلم كلام زيادة لانه ما يلفظ من قول الا لديه رقيب عتيد


سلام يا صاحبي

صاحب المضيفة said...

اختي خديجة


رحنا وشوفنا الحمد لله


زيادة قوية وفي نفس السياق ايضا

تحياتي

صاحب المضيفة said...

العزيزة ... منى


شكرا لزيارتك وتعليقك وجميل نك تاخدي بالك من كلامك وده شيء رائع


تحياتي ودعواتي

صاحب المضيفة said...

ايوةشة هانم


شكرا لمرورك الطيب


كل التحية والاحترام

لســـه بخيـــر said...

ساعات لما أركز فى بعض الكلمات اللى انا بقولها بقيت أستغرب أوى من الكلمات العاميه الدارجه بين الناس على الرغم إن من الممكن يكون لها معنى مش كويس فى اللغه .
على فكره موضوعك دا جه قريب أوى للحمله اللى تم تدشينها على موقع facebook وأنا شاركت بفعاليتها على مدونتى وأتمنى إنك تشاركنا فيها وهى بعنوان "حفاظًا على لفتنا العربيه .. لا تكتب فرانك آرب "

لســـه بخيـــر said...

جزاك الله خيرًا وأتمنى منك أن تشارك معنا فى هذه الحمله

و لك جزيل الشكر
يا
صاحب المضيفه

sal said...

اولا الف مبروك
اهو كلام فى كلام واى كلام
مرة كنت فى وسط البلد وشفت تاكسى كاتب كلام كثير اوى علىها وبخط كبير جدا مقارنة ببقية المكتوب ...عارف كاتب ايه ...
سلام يا بلد الكلام!!؟
مدونة دمها خفيف اتمنى لك التوفيق